13കാരനെ പീഡിപ്പിച്ചു; ഉറുദു അധ്യാപകൻ അറസ്റ്റിൽ, ദിവസങ്ങളുടെ വ്യത്യാസത്തിൽ രണ്ടാം അറസ്റ്റ്

മലപ്പുറം: 13 വയസുകാരനെ ലൈംഗികമായി പീഡിപ്പിച്ച കേസിൽ മലപ്പുറം ഗവ. ബോയ്‌സ് ഹൈസ്‌കൂളിലെ ഉറുദു അധ്യാപകൻ അറസ്റ്റിൽ. മലപ്പുറം മുണ്ടുപറമ്പ് സ്വദേശിയായ കുഞ്ഞിമൊയ്തീൻ(52)ആണ് അറസ്റ്റിലായത്. 12 വർഷത്തോളമായി മലപ്പുറം ഗവൺമെന്റ് ബോയ്‌സ് ഹൈസ്‌കൂളിലെ ഉറുദു അധ്യാപകനാണ് പ്രതി. 13 വയസുകാരന് നേരെ പലതവണ ലൈംഗികാതിക്രമം നടത്തിയെന്നാണ് കേസ്. സ്കൂളിൽ കൗൺസിലിംഗ് നടത്തിയപ്പോഴാണ് കുട്ടി പീഡന വിവരം തുറന്നുപറയുന്നത്. തുടർന്ന് മലപ്പുറം ചൈൽഡ് ലൈൻ പ്രവർത്തകരുടെ നിർദ്ദേശ പ്രകാരം കുട്ടിയുടെ വീട്ടിലെത്തി മൊഴി രേഖപ്പെടുത്തുകയായിരുന്നു. ഇതിന്റെ അടിസ്ഥാനത്തിൽ കേസ് രജിസ്റ്റർ ചെയ്ത് അന്വേഷണം ആരംഭിച്ചു.

അതേ സമയം 13കാരനെ പലതവണ പീഡനത്തിന് ഇരയാക്കിയ കേസിൽ മലപ്പുറം ബോയ്‌സ് ഹയർസെക്കണ്ടറി സ്‌കൂളിലെ മറ്റൊരു അധ്യാപകൻ അറസ്റ്റിലായത് ദിവസങ്ങൾക്ക് മുമ്പാണ്. നേരത്തെ അറസ്റ്റിലായതും ഉറുദു അധ്യാപകൻ തന്നെയാണ്. അധ്യാപകനും വലിയാട് സ്വദേശിയുമായ വലിയാട് ഷാഹിമഹൽ വലിയപറമ്പൻ വീട്ടിൽ അലവിയുടെ മകൻ മുഹമ്മദ് ബഷീർ (55)ആണ് അറസ്റ്റിൽ ആയത്. 2019 മുതൽ പലതവണ കുട്ടിയെ പീഡനത്തിന് ഇരയാക്കുകയായിരുന്നു. കുട്ടിക്ക് അശ്ലീല വീഡിയോ കാണിച്ചുനൽകിയ പ്രതി പലതവണയായി പണവും നൽകി പ്രലോഭിപ്പിക്കുകയായിരുന്നു. കുട്ടിയുടെ പെരുമാറ്റത്തിൽ അസ്വഭാവികത തോന്നിയ അധ്യാപകർ കാര്യം തിരക്കിയപ്പോഴാണ് പീഡന വിവരം പുറത്തറിയുന്നത്.