എന്നെയും കുടുംബത്തെയും ജീവിക്കാന്‍ അനുവദിച്ചില്ല; അങ്ങനെ ഓടിയ ഓട്ടമാണ് കേരളത്തില്‍ നിന്ന്: മംമ്ത മോഹൻദാസ്
മലയാളികളുടെ പ്രിയ താരമാണ് മംമ്ത മോഹൻദാസ്. കാന്‍സര്‍ രോഗത്തെ ധൈര്യം കൊണ്ട് തോല്‍പിച്ച് മുന്നേറിയ മംമ്ത ഒരുപാടുപേർക്ക് പ്രചോദനമാണ്. ജീവിതം കൊണ്ട് മറ്റുള്ളവരെ പ്രചോദിപ്പിച്ചുകൊണ്ടിക്കുന്ന മമതയുടെ വിശേഷങ്ങളും പലര്‍ക്കും ഉന്മേഷം നൽകുന്നതാണ്. വിറ്റിലിഗോ അഥവാ വെള്ളപ്പാണ്ട് എന്ന ത്വക്ക്‌രോഗത്തെ അതിജീവിക്കാനുള്ള ശ്രമത്തിലാണ് മംമ്ത. തുടരെ തുടരെ വെല്ലുവിളികൾ അസുഖത്തിന്റെ പേരിലും തന്റെ ജീവിത സാഹചര്യങ്ങളുടെ പേരിലും മംമ്തയെ പിടികൂടിയിട്ടും താരം പതറിയില്ല. അതിനാൽ തന്റെ തൊലിപ്പുറത്തെ യഥാർത്ഥ അവസ്ഥ യാതൊരു മറയും കൂടാതെ നടി തന്റെ ആരാധകരുമായി പങ്കുവെക്കുകയായിരുന്നു.
വിവാദങ്ങള്‍ വന്നപ്പോള്‍ മലയാള സിനിമയില്‍ നിന്നും മാറി നിന്നതിനെ കുറിച്ച് പറയുകയാണ് മംമ്ത.
‘ലങ്ക’ എന്ന സിനിമ ഇറങ്ങിയപ്പോള്‍ ചിത്രത്തിലെ ഇന്റിമേറ്റ് രംഗങ്ങള്‍ വിവാദമായിരുന്നു. ഇതോടെ മലയാള സിനിമയില്‍ നിന്നും കുറച്ച് കാലത്തേക്ക് മംമ്ത മാറി നിന്നിരുന്നു. ഇതിനെ കുറിച്ചാണ് താരം ഇപ്പോള്‍ തുറന്നു പറഞ്ഞിരിക്കുന്നത്.
”ലങ്ക കഴിഞ്ഞ് ഞാന്‍ മലയാളത്തില്‍ നിന്ന് പോയി. ആളുകള്‍ എന്നെയും കുടുംബത്തെയും ജീവിക്കാന്‍ അനുവദിക്കുന്നില്ല. മാഗസിനില്‍ ഒരു കാര്യം പ്രിന്റ് ചെയ്ത് വന്നാല്‍ പിന്നെ ആ മാഗസിന്‍ എല്ലാ വീടുകളിലും ഉണ്ടാവും. അങ്ങനെയായിരുന്നു അന്ന്. അങ്ങനെ ഓടിയ ഓട്ടമാണ് കേരളത്തില്‍ നിന്ന്” എന്നാണ് മംമ്ത ഇന്ത്യാഗ്ലിറ്റ്‌സിന് നല്‍കിയ അഭിമുഖത്തില്‍ പറയുന്നത്. എന്നാല്‍ ഇന്നത്തെ യുവ തലമുറയ്ക്ക് ഇത്തരം വിവാദങ്ങള്‍ക്ക് ലാഘവത്തോടെ കൈകാര്യം ചെയ്യാന്‍ പറ്റുമെന്നും മംമ്ത പറയുന്നു. 2011 ല്‍ ആണ് ലങ്ക പുറത്തിറങ്ങിയത്. സുരേഷ് ഗോപി നായകനായ ചിത്രത്തിലെ ഇന്റിമേറ്റ് രംഗങ്ങള്‍ വിവാദമായിരുന്നു.
‘ലൈവ്’ ആണ് മംമ്തയുടെതായി റിലീസിന് ഒരുങ്ങുന്ന ചിത്രം. വി.കെ പ്രകാശ് സംവിധാനം ചെയ്യുന്ന ചിത്രത്തില്‍ പ്രിയ വാര്യര്‍, ഷൈന്‍ ടോം ചാക്കോ, സൗബിന്‍ എന്നിവരാണ് പ്രധാന വേഷങ്ങളില്‍ എത്തുന്നത്.
Comments are closed.