അന്തിമ വോട്ടര്‍ പട്ടിക; സംസ്ഥാനത്ത് 5.75 ലക്ഷം പുതിയ വോട്ടര്‍മാര്‍, ആകെ 2,70,99,326

ലോകസഭ തിരഞ്ഞെടുപ്പിന് മുന്നോടിയായി സംസ്ഥാനത്ത് പ്രസിദ്ധീകരിച്ച അന്തിമ വോട്ടർപട്ടികയില്‍ 5,74,175 വോട്ടർമാരാണ് പുതുതായി പേരു ചേർത്തത്.

ഇതോടെ ആകെ വോട്ടർമാരുടെ എണ്ണം 2,70,99,326 ആയി. പ്രത്യേക സംക്ഷിപ്ത വോട്ടർ പട്ടിക പുതുക്കല്‍ 2024-ൻറെ ഭാഗമായി വോട്ടർ പട്ടിക ശുദ്ധീകരിക്കാൻ മികച്ച പ്രവർത്തനമാണ് സംസ്ഥാനത്ത് നടന്നതെന്ന് മുഖ്യതിരഞ്ഞെടുപ്പ് ഓഫീസർ ശ്രീ. സഞ്ജയ് കൗള്‍ ഐ.എ.എസ് പറഞ്ഞു.

ബൂത്ത് ലെവല്‍ ഓഫീസർമാർ സമ്മതിദായകരുടെ വീടുകളിലെത്തി മരണപ്പെട്ടവരുടെ ഉള്‍പ്പെടെയുള്ള വിവരം ശേഖരിച്ചിരുന്നു. ഇതിൻറെ അടിസ്ഥാനത്തില്‍ 3,75,867 പേർ വോട്ടർപട്ടികയില്‍ നിന്ന് ഒഴിവാക്കപ്പെട്ടു. 27.10.2023-ല്‍ പ്രസിദ്ധീകരിച്ച കരട് വോട്ടർ പട്ടികയിന്മേല്‍ സമ്മതിദായകരുടെ ആക്ഷേപങ്ങളും അഭിപ്രായങ്ങളും പരിഗണിച്ചുള്ളതാണ് അന്തിമ വോട്ടർ പട്ടിക.

അന്തിമ വോട്ടർപട്ടികയില്‍ പേര് ചേർക്കാൻ കഴിയാതെ പോയവർക്ക് തിരഞ്ഞെടുപ്പിന് മുൻപ് വരെ അപേക്ഷ സമർപ്പിക്കുവാൻ അവസരമുണ്ട്. ഇത് എല്ലാവരും പരമാവധി പ്രയോജനപ്പെടുത്തണമെന്നും മുഖ്യതിരഞ്ഞെടുപ്പ് ഓഫീസർ ശ്രീ. സഞ്ജയ് കൗള്‍ ഐ.എ.എസ് അഭ്യർത്ഥിച്ചു. അന്തിമവോട്ടർ പട്ടിക പരിശോധിക്കുന്നതിനായി സംസ്ഥാന (www.ceo.kerala.gov.in) ലഭ്യമാണ്. താലൂക്ക് ഓഫീസുകളിലും വില്ലേജ് ഓഫീസുകളിലും ബൂത്ത് ലെവല്‍ ഓഫീസറുടെ കൈവശവും അന്തിമ വോട്ടർ പട്ടിക ലഭിക്കും. അംഗീകൃത രാഷ്ട്രീയ പാർട്ടികള്‍ക്ക് താലൂക്ക് ഓഫീസുകളില്‍ നിന്ന് വോട്ടർ പട്ടിക കൈപ്പറ്റാവുന്നതാണ്.

അന്തിമ വോട്ടർ പട്ടികയിലെ ചില സുപ്രധാന വിവരങ്ങള്‍ ചുവടെ:

ആകെ വോട്ടർമാർ – 2,70,99,326
ആകെ സ്ത്രീ വോട്ടർമാർ – 1,39,96,729
ആകെ പുരുഷ വോട്ടർമാർ – 1,31,02,288
ആകെ ഭിന്നലിംഗ വോട്ടർമാർ – 309
സ്ത്രീ പുരുഷ അനുപാതം – 1068
കൂടുതല്‍ വോട്ടർമാർ ഉള്ള ജില്ല – മലപ്പുറം (32,79,172)
കുറവ് വോട്ടർമാർ ഉള്ള ജില്ല – വയനാട് (6,21,880)
കൂടുതല്‍ സ്ത്രീ വോട്ടർമാർ ഉള്ള ജില്ല – മലപ്പുറം (16,38,971)
കൂടുതല്‍ ഭിന്നലിംഗ വോട്ടർമാരുള്ള ജില്ല – തിരുവനന്തപുരം (60)
ആകെ പ്രവാസി വോട്ടർമാർ – 88,223
പ്രവാസി വോട്ടർമാർ കൂടുതലുള്ള ജില്ല – കോഴിക്കോട് (34,909)
സംസ്ഥാനത്ത് 25,177 പോളിംഗ് സ്റ്റേഷനുകളുണ്ട്.